رئيس مجلس الادارة:

د. محمود مسلم

رئيس التحرير:

مصطفى عمار

رئيس مجلس الإدارة:

د. محمود مسلم

رئيس التحرير:

مصطفى عمار

علاقات و مجتمع

طنط فيفي| الحلقة الرابعة.. جوزي عايز يهاجر برا مصر

كتب: الوطن -

03:28 م | الجمعة 08 ديسمبر 2017

صورة أرشيفية

أنا عندي 43 سنة وبشتغل مهندسة في شركة بترول كبيرة وضعي في الشغل كويس جدا والحمدلله.. أنا متجوزة من طبيب بقالنا حوالي 15 سنة وربنا أكرمني بولد وبنت.. من فترة زوجي بدأ يتكلم في إننا محتاجين نسافر برا مصر عشان الولاد يتعلموا أحسن ونلاقي مستوى أفضل ماديا ومعنويا مع إن إحنا الحمدلله مستوانا معقول لكن هو مبقاش طايق البلد.. في البداية كنت ساكتة ومش بتكلم عشان معملش مشاكل مكتنش متخيلة إنه بيخطط لده بجد.. لكن من كام يوم جه قالي إنه قدم في منحة وردوا عليه بالموافقة وبدأ يكمل أوراقه والمفروض بيتفق معايا إنه هيروح ويبعتلي أنا والولاد بعد ميلاقي شغل هناك.. أنا مش عارفة أعمل ايه

أنا محتارة جدا فعلا بين إن فعلا عايزة ولادي يتعلموا ويدخلوا جامعات أجنبية عشان مستقبلهم وبين إنني أتخلى عن شغلي وأبدأ من جديد في السن ده وبعد كل المجهود اللي عملته في الشركة اللي أنا فيها أسيبه وأروح بلد معرفش فيها حد ولا ممكن ألاقي شغل بسهولة ويمكن ملاقيش أصلا وده الأغلب.. مش عارفة أعمل ايه خالص

 

بصي يا حبيبتي.. وضعك صعب ومحير جدا حاسة بيكي لكن أرجع وأقولك تعالي نحسبها صح ونحاول نمسك العصاية من النص طالما جوزك أخد الخطوة وجتله فرصة مقدرش أقولك احرميه من حلم هو كان بيجري وراه وهو كان بيعمل كده ليه مهو بردو عشانك أنتي وعيالك.. لو عايزة نصيحتي سيبيه يروح وياخد فرصته يمكن هو لو راح من نفسه يقولك لا مش عايز أربي عيالي في المجتمع المنفتح ده وإنهم مش شبه عادتنا وتقاليدنا ومش عايز أحرمهم من بلدهم ويكون هو كده جاب الحل من نفسه وخلصت القصة وربنا كرمه بدرجة علمية جديدة تساعده في مستقبله بشكل أفضل..

والنص التاني بقى هو إنه يروح ويعجبه الحال ويطلب منك زي مهو مخطط تروحيله وكده بقى تبقى الفأس وقعت في الرأس وأنتي يا حبيبتي مضطرة تتصرفي.. هاتي ودنك بقى أقولك تعملي ايه.. أنتي بتشتغلي من سنين في الشركة دي يعني أكيد تقدري تعملي إجازة بدون مرتب سنة ع الأقل.. وهو المطلوب تسمعي كلام جوزك وتاخدي إجازة وتروحي وتجربي الحياة والعيشة لو ارتاحتي يبقى خدي الخطوة التانية واستقري أنتي وعيالك وكملي.. لو مرتاحتيش يبقى لله الأمر من قبل ومن بعد ولازم تقعدي وتتكلمي مع جوزك وتصارحيه بكل اللي في بالك وتقوليله أهو يا حبيبي أنا ماينت وسمعت كلامك عشان خاطرك  وتفضفضي معاه وتقعدوا تتفقوا في كل اللي يريحكم..

وفي الأخر يا حبيبتي أرجع وأقولك أهم حاجة خلي بالك من بيتك وعيالك وجوزك "لمة العيلة" أهم من أي حاجة تاني.. يمكن تكون فرصة ليكي أنتي كمان.. ده اختبار من عند ربنا ليكي ولجوزك وقوة علاقتكم والحب والتفاهم اللي بينكم هو اللي هيحسم القصة.. لكن تاني أقولك خلي بالكم أنتو الاتنين من عيالكم عشان متتسببوش لهم في صدمة بسبب فرق الطباع في المجتمع.. وربنا يوفقكم وطمنيني عليكي

 

شاركوني مشكلاتكم على الميل ده:honna@elwatannews.com

الكلمات الدالة