المشاية من القطع الأساسية التي غالبا ما تعتمد عليها الأم مع أطفالها لإلهائهم ومساعدتهم على المشي في السن الصغير، لكن آخر أبحاث أكدت أن المشاية لها أضرار كبيرة على عظام الأطفال.

الدكتور أحمد توفيق أخصائي آلام العظام والمفاص قال إن المشاية أحد أسباب تأخر الأطفال في المشي بسبب اعتمادهم عليها، بالأضافة إلى أنها قد تسبب تشوهات في الساق مع ضعف في عضلات الفخذ.

وتابع توفيق: "ورغم كل التحذيرات اللي اتقالت واللي بتتقال هتفضل اللعبة دي هي المفضلة لكل أسرة واللي محققة أكبر نسبة مبيعات للأطفال، عشان كدة صعب أننا نمنعها او نقول ما تحطوش الطفل فيها نهائي، لأ هنستخدمها بس بشروط".

وتابع: "أهم حاجة الطفل ما يتحطش فيها ورجليه تلمس الأرض قبل ما يكون بدأ يقف على رجليه واللي في الغالب عند 9 شهور عشان نضمن أن العضم والعضلات تستحمل وقفته في المشاية فميحصلش تشوهات، ممكن كمان نحط الطفل فيها ونرفعه بحيث رجليه ما تلمسش الأرض، كمان يفضل ان الطفل ما يتحطش فيها لاكتر من ساعة في اليوم ويكون طبعا المكان اللي هو فيه آمن ومفيش حاجة يتخبط فيها أو لا قدر الله باب مفتوح على سلم أو مكان خطر".