من فضلكم عايزة أخد رأي الناس في مشكلتي بس من غير إهانة أرجوكم.. أنا عندي 34 سنة ومتزوجة من 9 سنين وعندي طفلين باختصار شديد جوزي طلقني لأنه معتقد إني خنتهجوزي طبيعة شغله صعبة بيشتغل طول اليوم وممكن في الإجازة يكلموه ينزل ويسيبنا.. انشغاله طول الأسبوع ونومه أول دخوله البيت عملي فراغ كبير..

حكايتي بدأت من 4 شهور كنت بقضي وقت فراغي على النت بكلم صحباتي.. اللي دايما يحكولي عن اهتمام أزواجهم بيهم وسفرهم في الإجازات والهدايا لما يتخانقوا.. أنا وجوزي حتى لما كنت اتخانق معاه يسيبني ويروح الشغل يقولي مش فاضيلك ومن زهقي أرجع أصالحه.. كل حاجة في حياتي كانت عادية ومملة قوي لحد في مرة واحدة من صحباتي حكت لي إن في واحد اتعرف عليها وبتتكلم معاه ع الشات وبيدلعها ويبعتلها ورد على مكان شغلها.. بدأت أتخيل إن أنا كمان في واحد يعرفني ويبتعامل معايا كويس وبدأت أحكيلها عن "الشخصية دي" والله العظيم هو "خيالي" أنا مبخرجش من البيت خالصوهما كانوا بيصدقوني ونظرتهم لي اتغيرت بقوا يسمعوا حكاياتي ويتفاعلوا معايا ويقولوا يا بختك ياريت ده يكون جوزي..

وفي يوم والدتي كلمتني قالت إنها تعبانة ومحتجاني أروحلها.. أخدت الولاد ورحت وبعد شوية جوزي كلمني قالي أبات عند ماما عشان تعبان ومش قادر يجيلنا وهيروح على البيت لأن مش قادر يروح الشغل التاني..

تاني يوم جوزي كلمني قال أنزله طلبت منه يطلع يتغدى ويسلم على ماما قال إنه مستعجل.. المهم نزلت لقيت وشه شكله مضايق جدا مبيردش ولا كلمة ركبنا ولما وصلنا البيت قالي نيمي الولاد عايز اتكلم معاكي شوية استغربت ومكانش في بالي أي حاجة..خلصت ودخلت لقيته فاتح اللابتوب.. قلبي كان حيوقف من الخضة افتكرت إني بسيب الأكونت مفتوح على اللابتوب وهو عارف الباس لكن أنا كنت بسيبه لأنه عمره مفتحه ولا فتش ورايا في حاجة

المهم لقيته فاتح الرسايل وبصلي بشكل عمري مهنساه في حياتي وقالي أنتي طالق يا بنت الناس المحترمة.. حاولت أبوس جزمته وأقوله ده كذب أنا كنت بتخيل والله مكنت بخرج من البيت من غير إذنك ولا في أي حد في حياتي ده شخص خيالي أنا اخترعته عشان يسد الفراغ اللي أنا فيه.. قالي مش عايز أشوف وشك ومش عايز فضايح عشان خاطر الولاد.. وساب البيت ونزل ومن يومها مبيردش علي وحتى الأولاد بيتصل على ابني يقوله هات أختك وانزلي تحت البيت ياخدهم يخرجوا ساعة أو اتنين ويرجعهم ويبعت معاهم ظرف فيه مصروفات البيت.. مبيكلمنيش ولا مديني فرصة أفهمه أو أوضحله أي حاجة

أنا كذابة لكن مش خاينة والله العظيم أنا عمري مخونته.. ده كان شخص خيالي.. أنا نفسي ترجع حياتي زي مكانت ونفسي جوزي يعرف الحقيقة ومش عارفة اتصرف

ازيك يا حبيبتي، طبعا انتي عارفة انك غلطانة، مش هاتكلم كتير في الحتة دي ،بس كمان مش عاوزاكي تفتري على نفسك، عشان اسم النبي حارسه جوزك يوم ما ربنا يكرمه ويدور على حاجة تخصك يقوم يفتح رسايلك مع صاحباتك؟

زي مانتي غلطانة هو غلطان، حقه يزعل لكن كمان حقه يفكر صح، نصيحتي ليكي يا بنتي اصبري شوية لما النفوس تهدا واطلبي قابليه وهاتي التواريخ اللي قلتي فيها بالكدب انك مع حد تاني وكنتي فيها معاهركزي شوية واتكلمي معاه بالراحة وفهميه ان الللي حصل غلط وعيب لكن هو كان جزء منه

واوعي تنسي امه مافضحكيش زلا فتح بقه يعني سايب الباب مفتوح، زيمكن يا حبيبتي كل دا حصل عشان يفوق لنفسه وانتي كمان... الحياة الحلوة بجد بنعيشها مش بنحكي عنها بس