الاستقلالية والاعتماد على النفس هما هدف كل أب وأم.. وأحمد سالم هو واحد من آلاف الذي يحلم بأن يرى ابنيه عمر ويوسف يتحملان المسؤولية ويعتمدان على أنفسهما لذلك قرر مساعدتهما في أن يبدءا عملهما الخاص رغم أنهما يبلغان من العمر 10 سنوات.

يحكي سالم عن تجربته: "طول عمري بحلم أربي عمر ويوسف زي ما أبويا رباني ومهما أثبتت الدراسات أو اكتشف العلماء لكن تبقي مدرسة الحياة هي الأهم،عشان كدة وافقت إنهم ينزلوا الشغل في الصيف واستفادوا كتير من التجربة، بعدها جالي عمر وقاللي أنا عندي 10 سنين وعايز اشتغل زي ما حضرتك كنت بتشتغل في سني وكمان عايز يوسف معايا في الشغل وعملنا اجتماع مغلق خطير".

ويشرح سالم اقتراح نجله: "بما إن عمر دودة قراية زي أبوه وبما إن يوسف سوسة فلوس وبما إن الكتب بعد التعويم بقت غالية، قلنا نعمل صفحة لبيع وشراء الكتب المستعملة والجديدة بنص الثمن يعني اللي عنده كتب قديمة ممكن يبيعها على الصفحة عشان يشتري كتب جديدة واللي عايز كتاب حايلاقيه عندنا وكمان هنعمل خدمة توصيل للمنازل عشان نوفر عليهم المواصلات ويبقي الكل استفاد وأطلقنا على المشروع اسم bookmania".

سالم أكد أن الهدف من المشروع الصغير دعم إحساسهما بالاستقلالية والمسؤولية، وطلب من الجميع تشجيع الأطفال على العمل.

الفكرة لاقت إعجابا من الإعلامية شافكي المنيري، وعلقت على صفحة الأب على موقع التواصل الاجتماعي "فيس بوك": "احترامي الكبير لك، أب فاهم وواعي لمسؤوليته في التربية والاحتضان، أولاد جمال رجاله صغيرين بكرة يبقوا عندهم ثقة واعتماد على نفسهم، فكرة رائعة وتربية محترمة".