نشرت صفحة "ثورة البنات"، عدد من الإرشادات تجنبا لمواقف التحرش، تحت عنوان "6 خطوات للحفاظ على المساحة الشخصية".

وأوضحت الصفحة، في منشور لها بموقع التواصل الاجتماعي "فيس بوك"، أن الخطوات هي:

1- المساحة الشخصية

التحرش الجنسي هو فعل تعدي على مساحة شخصية لشخص تاني، ولذلك على الأشخاص المساعدين إنهم يحترموا المساحة الشخصية للبنت المتحرش بها.

- المساحة الشخصية: احترم مساحة الـ 45سم بينك وبينها.

- الصوت: استخدم نبرة صوت مناسبة، تجنب الصوت العالي لأنه بيوترها، والصوت المنخفض لأنه بيزود توترها.

- اللمس: لمس جسم المتحرش بها هو تعدي آخر عليها، كالإحتضان لإبعادها عن المتحرش، شد الدراع، الدفع، السحب، العنف.

2- الأسئلة

التحرش الجنسي هو فعل سلطوي ضد البنت وبيحصل بدون إرادتها، لذلك لازم المتدخلين في الموقف دة يراعوا نقطة مهمة وهي مخاطبة البنت نفسها ودا بيقلل من حدة الموقف لأنه بيرجع ليها حق القرار في رد الفعل المناسب ليها ولظروفها، والأسئلة نوعين:

أسئلة مرحب بها مثل "محتاجة مساعدة؟ السؤال عن إحتياج البنت لمساعدة بيخفف من توترها، خاصة إن أغلب المتواجدين في مواقف التحرش بيتوجهوا باللوم للبنت، سؤال المساعدة بيساعد البنت في تمييز الشخص المنتهك عن باقي الأشخاص اللي بيساعدوها".

أسئلة محظورة:

تجنب الأسئلة الاستفسارية أو اللي بتوحي باللوم للبنت، لأنها بتزيد من توترها وغير فعالة في تقديم المساعدة: "إيه جابك هنا؟ ليه لابسة كدة؟ فين أهلك؟ ليه ماشية لوحدك؟ كنتي فين؟ رايحة فين؟ إتحرش بيكي إزاي؟ عملك إيه بالظبط؟ لمسك إزاي؟ قالك إيه؟".

3- المساعدة

في حال موافقة البنت، أطلب المساعدة من المتواجدين زي إنهم: يمسكوا المتحرش/ يندهوا لأقرب عسكري مرور/ تسألهم عن أقرب قسم شرطة "لو حصل الحادث في مواصلة عامة، أطلب من السواق إنه يقف عند أقرب قسم ولو رفض أطلب من باقي الركاب يضغطوا عليه أو تهدده إنه هيعرض نفسه لمسئولية قانونية، زي الحبس أو الغرامة أو سحب الرخص، واطلب من أي بنت/ست واقفة إنهم يقربوا منها ويحاولوا يهدوها ويطمنوها".

4- القوة العضلية

احرص أولاً على شل حركة المتحرش مثلاً "لوي الأصابع" "ركل المنطقة الحساسة" سيساعدك في استهلاك أقل مجهود جسدي في صد أي ضربة أخرى ممكن تأذيك أو تأذي البنت. 

5- الشهادة

في حال موافقة البنت على المحضر، اعرض عليها إنك تكون شاهد على الحادث، وأطلب من المتواجدين الشهادة معاكم. دا هيشجع البنت إنها تعمل المحضر ومتقلقش من عدد الشهود، أو إنها تدخل القسم لوحدها، وتمر بمرحلة. 6- ما بعد التحرش الجنسي

"متأكدين إن أي ولد بيقرر بإرادة حرة إنه يتدخل في موقف تحرش ببنت، على درجة وعي بأهمية الأفعال اللي بعد الواقعة"، ولكن لزيادة التأكيد يرجى مراجعة النقط الآتية:

- احترام رغبة البنت في الموافقة على عرض مساعدتك أو رفضها.

- احترام قرار البنت في إنهاء الموقف بمحضر أو لأ.

- سؤال البنت لو لسه محتاجة مساعدة من أي نوع.

- سؤال البنت لو محتاجة تقف معاها لحد ما شخص يوصل لها.

وتابعت الصفحة عليك تجنب بعض الأفعال:

- القرار دائما يبدأ من البنت "علشان كدة لازم تسألها على كل خطوة".

- لوم البنت بأي شكل. اللبس/ المشي لوحدها/ ركوبها مواصلات عامة/ اللوم على إنها قررت متعملش محضر.

- التسفيه من حجم الواقعة زي: "الحمدلله جت على أد كدة" أو "كويس إنه ممدش إيده عليكي"، أو "إيه يعني كلمة جنسية ماهو ملمسكيش".

- انت بتتدخل لأن تم التعدي على شخص، مش لأنك ولد ولازم تدافع عن كل البنات في الشارع.

- تفهّم حجم الضغط اللي هيحصل عليك أثناء مساعدتك لبنت، زي السباب أو الألفاظ الخارجة والإتهام بأنك متفق مع البنت.

- وجودك في موقف التحرش هو تقدير لإمتيازاتك كذكر في المجتمع وإزاي تقدر تستغلها لصالح بنت ملهاش نفس إمتيازاتك.

- استخدام قوتك العضلية لصد التحرش أحيانًا هو فعل ناتج عن إستيائك من فعل التعدي وليس بدافع الغيرة أو الرجولة أو الحماية.

وأكدت الصفحة على أن تلك الخطوات لا تصلح في كل مواقف التحرش الجنسي، خاصة حالات التحرشات والإعتداءات الجنسية الجماعية.